Ég endurræsti höfundarferil minn 2016, opnaði ORÐLIST.is og fór aftur að skrifa bækur eftir 20 ára hlé. Síðan hafa komið út 5 bækur og ein á leið í prentvélar til útgáfu í sumar. 6 bækur á 7 árum – ég má vel við una. Þá verða bækur mínar orðnar 9 talsins, 7 ljóðabækur og 2 skáldsögur. Mér finnst ég rétt vera að byrja. Næst ætla ég að ritstýra, og að hluta til skrifa, bók um merkan íslenskan vísindamann, það er sumarverkefnið og svo áfram uns verkefnið er í höfn. Á haustdögum fer ég að huga að nýrri skáldsögu.

Þakklæti mitt er mikið fyrir að fá að sitja að þessum brunni sagna og ljóða, gleðin yfir að skrifa og tjá er ósvikin og ásamt því að vera móðir er þetta kjarni lífs míns.

Vonandi nennir svo einhver að lesa eitthvað af því sem ég skrifa. Auðvitað er búið að skrifa allt undir sólinni og allir (í það minnsta Íslendingar) skrifandi og/eða í ritlistaráföngum svo það mæðir orðið verulega á blessuðum lesendunum.

Sumt verður ekki umflúið og þannig er því farið með mig og skrif – raison d’être!